Hægri Nám á Glasi: Fleiri enn 100 fulltíðarlesandi

27. august 2021

Fleiri og fleiri ynskja at nema sær hægri útbúgvingar, uttan at noyðast at flyta av landinum. Hetta er greitt, nú metstórt tal av lesandi byrja á Hægri Námi á Glasi.

Hægri Nám á Glasi hevur veruliga merkt økta áhugan fyri at útbúgva seg í Føroyum. Talið av hægri útbúgvingum er økt so við og við seinnu árini, og nú talið á fulltíðarlesandi á Hægri Námi á Glasi er farið upp um tey 100, gerst størri grundarlag fyri nýggjum útbúgvingum.

Í gjár, hósdagin 26. august, var fyrsti undirvísingardagur í nýggja lestrarárinum á Hægri Námi á Glasi. Í reyða bygninginum – fyrr Føroya Handilsskúla – á Glasi í Marknagili savnaðust tey yvir 100, sum nú eru fulltíðarlesandi á Hægri Námi á Glasi. Hetta er fyrstu ferð, at talið er farið upp um tey 100. Helmingurin av teimum, um 60 í tali, byrjaðu í gjár. Hesi eru innskrivað á útbúgvingarnar Marknaðarførslubúskap, Framleiðslutøkni og Innovatión. Frammanundan eru lesandi innskrivað á Tænastubúskap, Fíggjarbúskap og Byggifrøði.

Innovatión og Byggifrøði eru sonenvdar professiónsbachelorútbúgvingar. Hesar taka trý ár sum fulltíðarlestur. Marknaðarførslubúskapur, Tænastubúskapur, Fíggjarbúskapur og Framleiðslutøkni eru styttri hægri útbúgvingar, svarandi til tvey-ára fulltíðarlestur.

Umframt hesar útbúgvingar, hevur Hægri Nám á Glasi eisini Akademiútbúgvingina, HD og Diplomútbúgving í leiðslu. Hesar eru skipaðar sum parttíðarplestur, so arbeiðslívið kann sameinast við hægri útbúgving. Stakar lærugreinar á hægri stigi og ein røð av førleikamennandi skeiðum innan ymsar vinnugreinar, fyrisiting og almenna tænastu verða eisini boðin út umvegis Skeiðsdepilin (sd.fo), sum er partur av Hægri Námi á Glasi.