Smiðju- og maskinbreyt

Yrkisrættað nám

Yvirlit yvir útbúgving

Smiðju- og maskinbreytin umfata yrkir so sum sveising, báta- og skipsmotorar, dreyging, fresing, vatn- og hitaskipanir til sethús, hydrauliskar stýringar, v.m. Sergreinirnar eru maskinsmiður, kleinsmiður, rustfastur kleinsmiður, rørsmiður, rør- og blikksmiður og sveisari.

Tú fært meira at vita um útbúgvingina við at lesa kunngerðina um útbúgvingina her.

Eisini er tú vælkomin at seta tegi samband við lestrarvegleiðarar skúlan á lv@glasir.fo.

Møguleiki er at byrja á smiðju- og maskinbreytini við ella uttan lærupláss

Upplýsingar

Tíðarskeið: 4 ár (við lærlingasáttmála)
Næsta skeið byrjar: August 2022. Tilmelding á innskriving.fo.

Kravdar lærugreinar og vallærugreinar
Maskinsmiður

Sum maskinsmiður arbeiðir tú við stýringstekniskum skipanum og maskinum. Í útbúgvingini lærir tú at dreyga, fresa og byggja upp, forrita, finna brek og at umvæla einfaldar stýringstekniskar skipanir. Tú lærir at velja røtt amboð og rætt dátugrundarlag í sambandi við framleiðsluuppgávur. Eisini lærir tú um framleiðslutilgongdir og at viðlíkahalda og montera høvuðspartarnar av einum motori, at gera minni konstruktiónir av plátu, røri og stálprofilum, og einfaldar viðlíkahaldsuppgávur av eitt nú pumpum og ventilum.
Kleinsmiður

Í útbúgvingini lærir tú um ymisk sløg av metalli, og hvussu tað kann formast. Ein týðandi partur av arbeiðinum er at velja rætt tilfar og rættan arbeiðshátt til tær ymisku uppgávurnar. Tú fært grundleggjandi vitan um at viðgera metal. Tú lærir at gera tilskeringar í plátur og rør, at montera lutir, maskinur og installatiónir og at viðlíkahalda framleiðslutól. Harumframt lærir tú at yvirflatu- og eftirviðgera metal og annað tilfar.
Rustfastur kleinsmiður

Sum rustfastur kleinsmiður lærir tú at gera samansetingar av forgreiningum og bukkingar í plátu og rørum í rustføstum stáli. Somuleiðis at velja egnaðar eftirviðgerðir av stáli og fremja yvirflatu- og eftirviðgerð av rustføstum stáltilfari.
Rør- og blikksmiður

Rør- og blikksmiðurin arbeiðir við nýgerð og røkt av vatn-, hita-, gass og ventilatiónsinnleggingum í sethúsum og virkjum. Tú lærir at seta upp hvs-stýriskipanir, oljuketlar og varandi orkuinstallatiónir, umframt at veita kundavegleiðing. Tú lærir eisini at gera tunnplátusamankomingar við sveising úr aluminium, stáli og rustføstum tilfari, at lodda, nitta og falsa. Sum rør- og blikksmiður lærir tú at leggja til rættis og gera minni skap í plátu-, rør- og stálprofilum, og at gera inndekningar og kappabjálving.
Rørsmiður

Rørsmiðurin arbeiðir við nýgerð og røkt av installatiónsarbeiði í sethúsum, verksmiðjum og virkjum. Tú lærir at seta upp hvs-stýringsskipanir, oljuketlar og varandi orkuinstallatiónir, og at veita kundavegleiðing. Eisini lærir tú at gera samankomingar, tilskeringar og evna til skurð í plátum og rørum. Sum rørsmiður lærir tú at leggja til rættis og gera minni skap í plátu-, rør og stálprofilum.
Sveisari

Sveisari arbeiðir við sveising, tilskering og framleiðsluuppgávum innan metaløkið. Tú lærir at evna til skurðir í plátur og rør og at velja rætta tilfarið, og hvussu tað skal eftirviðgerast. Eisini verður arbeitt við at viðlíkahalda amboð og maskinur og at yvirflatu- og eftirviðgera metal og annað tilfar, umframt at leggja til rættis samansettar sveisiuppgávur. Sveisari lærir í 2 ár og 6 mánaðir. Skúlagongdin er 35 vikur.