Stílmenning

Fólk hava til allar tíðir klætt seg, og klæði hava tískil altíð verið við í mál- og hugaheimi okkara. Tá vit við klæðum verja okkum móti kulda og náttúruni sum heild vísa vit umheiminum nógv um okkum sjálvi. Tí granska vit klædnasøguna gjøgnum fleiri túsund ár og í ymsum mentanum við at hyggja eftir myndatilfari. Næmingarnir tilevna klæði og klædnalutir eftir søguligum fortreytum. Dentur verður tó lagdur á nýggjari klædarák; frá 1900 til nú. Klæði og klædnastílur er ein týðandi partur av tí mentanararvi, sum skúlin skal bera fram. Stílmenning er tískil eitt amboð til menning og læring.

Kunnleiki um klæði og klædnastíl hevur alstóran týdning fyri arbeiðið í skúlanum og fyri virkan og veru næminganna. Tilevningin er ein av mongu leiðunum til kunnleika, sannkenning og persónliga menning. Tá ið klæði vera tilevnaði, fáa royndirnar heildarskap, og kunnleikin gerst sjónligur, ítøkiligur og møguligur at samskifta um. Í sínum estetiska og samtalandi eginleika kunna klæði vera við til at varðveita og menna skapanarhugin hjá næminginum. Somuleiðis kann tað vera við til at stuðla næminginum í at finna sítt egna støði í einum veruleika við stórum krøvum til stílin hjá tí einstaka í einum skapandi lestarumhvørvi.