Lívtøknifrøði

Lívtøknifrøði (Biotøkni) er tøknilig nýtsla av lívfrøðiligum skipanum. Lívtøknifrøði hevur røtur í nýtslu av evnafrøðiligari og lívfrøðiligari gransking til at menna siðbundna framleiðslu og virking av matvørum, ið eru grundaðar á plantur, djór og mikroorganismur. Lívtøknifrøði kann geva sítt íkast til burðardygg og nýmennandi svar upp á samfelagsligar avbjóðingar. Samstundis setur lívtøknifrøði etiskar spurningar og bjóðar okkara fatan av okkum sjálvum og øðrum lívverum av.

Á Glasi er lívtøknifrøði A ein tvey ára gongd, sum byggir á evnafrøði C og Lívfrøði C. Lærugreinin sameinir og nýtir lívfrøðiliga og evnafrøðiliga vitan, háttaløg og arbeiðshættir og fevnir um vísindagreinar sum lívfrøði, evnafrøði, lívevnafrøði, mýlalívfrøði og lívtøknifrøði.

Undirvísingin er tematisk og tekur støði í lívtøknifrøðiligum spurdómum, ið hava týdning fyri dagligdagin og dagsins samfelag. Í undirvísingini verður í stóran mun lagt upp til, at næmingarnir sjálvir granska og kanna. Í lívtøknifrøði verður arbeitt nógv verkligt í starvsstovu. Somuleiðis verður vitjað á stovnum og virkjum.