Næmingaráðsval verður 27. september

8. september 2021

Tann 27. september 2021 verður Næmingaráðsval – og ikki 24. september, sum fyrst ætlað. Tá skulu næmingar og lærlingar velja 9 umboð, sum næsta árið skulu mynda ráðið, sum er fyri alt Glasir.

Limir í næmingaráðnum kunnaðu lærlingar og næmingar á 1. ári um valið í atrium hósdagin 9. september kl. 11:15.

Luttøka í næmingaráðnum kemur á títt CV og verður nevnt í prógvinum. Í fleiri londum kann skjalfest luttøka í skipaðum arbeiði á skúlum og í felagsskapum gera mun, tá tú søkir hægri útbúgving og størv. Á næmingaráðsfundunum verður borðreitt við onkrum munagóðum at eta og drekka, so orka er til arbeiðið. Næmingaráðsarbeiðið gevur loyvda, skúlatengda fráveru. Øll kunnu stilla upp. Tær nýtist ikki at vera floksumboð, fyri at stilla upp – og tað ger onki, um tú stillar upp uttan at verða vald/ur.

Á síðuni hjá Næmingaráðnum her á glasir.fo stendur m.a.: “Eitt virkið og sterkt næmingaráð skal syrgja fyri, at lestrartíðin á Glasi verður so góð, sum yvirhøvur gjørligt. Glasir er ein stórur skúli við nógvum eldsálum. Næmingaráðið arbeiðir fyri at fáa íkast frá so nógvum flokkum, næmingum og lærlingum, so at næmingademokratiið kann blóma her. Vit fáa mest ávirkan her á skúlanum, um vit standa saman og hava eitt sterkt næmingaráð, sum kann umboða okkum øll og verða ein virkin og sterk rødd í samstarvinum við lærarar, starvsfólk og leiðslu á Glasi.

Næmingaráðið hevur møguleika fyri at seta arbeiðsbólkar og -nevndir – eitt nú aktivitetsnevnd, trivnaðarnevnd og næmingaredaktión – sum kunnu skipa tilboð og tiltøk á skúanum – fyri okkum øll.”

Lesi meira um, hvussu næmingaráðið skal samansetast og hvørji umboð skulu veljast her.