Opið hús verður á Glasi mánadagin 27. februar 2023 frá kl. 14.00, har tú kanst síggja umstøðurnar, vitja verkstøðini og frætta meira um allar yrkis- og miðnámsútbúgvingarnar, sum søkjast kann inn á til og við 15. mars 2023.

Skráin verður hendan:

Kl. 14.00: Dyrnar lata upp og møguleiki verður at síggja lestrarumhvørvi so sum hølir til tónleik, myndlist, ítrótt, alisfrøði, evnafrøði, verkstøð innan timbur, bil, hár o.a.

Kl. 16.30: Vælkomin og felagskunning í atrium um útbúgvingarmøguleikar á Glasi.

Kl. 17.00: Tríggjar kunningarrundir á 20 minuttir har høvi verður at hoyra meira um einstøku breytirnar.

Eisini verður møguleiki at fáa neyvari innlit í einstøku lærugreinarnar, leiðirnar og útbúgvingarnar. Lærarar og lestrarvegleiðarar eru at hitta, og tiltakið endar kl. 19.00.

Felagskunningin í atrium kl. 16.30 er um útbúgvingarmøguleikarnar á yrkisnámi og gymnasialum miðnámi. Eftir kunningina ber til at fara út á ymsu deildirnar og hoyra nærri um møguleikarnar á ávísu breytunum. Høvi verður at tosa við leiðslu og lærarar, og lestrarvegleiðingin hevur eina upplýsingarstovu, har svar fæst um tað allarmesta í sambandi við útbúgvingarvalið.

Yvirlit yvir allar útbúgvingarnar, sum kunnað verður, um sæst her. Á gymnasialum miðnámi eru stóru breytirnar búskaparbreyt, hugbreyt og náttúrubreyt. Afturat hesum eru fyrireikingarbreytin (fyrr HF) og skapandi fyrireikingarbreytin, sum er ein trý-ára útbúgving, ið samantvinnar yrkisnám og gymnasialt. Á yrkisnámi eru bilbreyt, elbreyt, smiðju- og metalbreyt, timburbreyt og hárbreyt. Harafturat eru klædnaatstøði og tilvirkisatstøði. Skapandi fyrireikingarbreytin hevur m.a. lærugreinar á klædnaatstøði. Eisini ber til at hoyra meira um autismuflokkin, serbreytina og FHS (eitt-ára støðisútbúgving innan fyrisiting, handil og skrivstovu).