Aftur til miðnámsrit

Læring á facebook - viðtal við Ólav Ellefsen

Eftir Tórður Johannesarson í miðnámsrit 4, desember 2014

Ein av mongu føroysku bólkunum á Facebook nevnist Læring. Ólavur Ellefsen stovnaði bólkin í desember 2011, og trý ár seinni hevur bólkurin 549 limir. Vit hava sett Ólavi nakrar spurningar um tankarnar aftanfyri bólkin.

Hví er tað neyðugt at hava ein slíkan bólk?

Í endamálsorðingini hjá bólkinum stendur, at hann er ætlaður teimum føroyingum, sum arbeiða við og hava áhuga í útbúgving, venjing, vitan og førleikum – og hvat hugtakið “læring” annars fevnir um.

Eg haldi, at tað er gagnligt við einum tvørfakligum samskifti um læring, óansæð fakliga bakgrund. Tað veri seg námsfrøðingar, lærarar, skeiðshaldarar, ráðgevar, lærandi, for­eldur, umsitarar ella tey, sum skapa læringstilfar. Í bólkinum hava fólk høvi at lesa og skriva um bæði aktuellar hendingar og tíðarleys læringsfyribrigdi, og tað gera tey so.

Sjálvur arbeiði eg við at menna og veita læringstøkni í eini skeiðsfyritøku, og havi brúkt nógva tíð seinastu árini – millum annað í bólkinum Læring – at økja um mína vitan um læring og menna mínar førleikar at skapa góðar læringsloysnir. Bólkurin er – ella skal gjarna vera – eitt gott amboð at læra um læring.

Hvaðani koma innleggini?

Størsti parturin av innleggunum eru viðmerkingar til greinar, sum limirnir finna á neti­num. Tað er eingin stýring av, hvør sleppur at leggja greinar út, ella hvat slag av greinum og viðmerkingum, talan er um.

Tú kanst siga, at bólkurin byggir á konnektivistiska hugsunarháttin, har tú lærir við at binda saman ymsar kunningarkeldur. Í hesum førum viðkomandi keldur um læring.

Tit hava valt at lata greinarnar standa á útlendskum máli. Hví?

Stutta svarið er, at tað tekur tíð og orku at umseta. Ein ørgrynna av tilfari er um læring á alskyns málum, og heldur enn at umseta heilar greinar, verður dentur lagdur á at við­merkja greinarnar á føroyskum og at seta tær inn í ein føroyskan kontekst. Tá tað er sagt, er eitt óbeinleiðis endamál við bólkinum at seta føroysk orð á læringsfyribrigdi og at menna eitt føroyskt læringsmál. Tað hevði sjálvsagt verið best, um fólk høvdu og góvu sær stundir at umseta mest við­komandi tilfarið, men tað má – eins og alt í einum tílíkum bólki – koma frá fólki sjálvum.