Próvtøkur

Kunning um royndir og próvtøkur verður løgd út her á síðuni. Her finnur tú tað nýggjastsa, sum er komið viðvíkjandi próvtøkum og reglum. Samstundis verða nýggjastu royndar- og próvtøkuyvirlitini løgd út her á síðuni. Tað sama er galdandi fyri nýggjastu útgávur av próvtøkuvegleiðingum

Í fyrsta teiginum niðanfyri er kunning um skrivligu próvtøkurnar á gymnasialum miðnámi og FHS á vári og sumri 2019. Hesar liggja í høvuðsheitinum millum 20. mai og 4. juni 2019.

  • PRÓVTØKUYVIRLIT: SKRIVLIGU PRÓVTØKURNAR Á GYMNASIALUM MIÐNÁMI, MAI-JUNI 2019

    Skriviligu próvtøkurnar í vár og í summar eru nú lagdar, so øll á gymnasialum miðnámi og á FHS kunnu seta krossar í kalendaran. Niðanfyri sæst yvirlit yvir dagarnar, tá ymsu próvtøkurnar eru.


    Yvirlitið (dagført 7. mai) er eisini tøkt sum PDF-skjal á leinkinum her.

    Seinasta undirvísingardagur hjá øllum breytaflokkum og FHS er 16. mai 2019. Tá verður próvtøkuætlanin hjá øllum flokkum kunngjørd. Ársroyndir vera kunngjørdar seinni.

    Vit skulu minna á, at tað er møtiskylda til allar próvtøkur og ársroyndir, sum eru fyriskipaðar. Tú ert tískil sum næmingur ikki leysur av skúlanum fyrr enn seinasta skúladag, sum er síðst í juni. Gevið gætur, at seinasti undirvísingardagur hetta skúlaárið (2018-2019) er 16. mai og seinasti skúla- ella próvtøkudagur er 28. juni 2019.

    Er næmingur fráverandi til eina próvtøku, telur hettar við í fráveruuppgerðini, og kann hann burturvísast, um hann longur hevur fingið skrivliga ávaring orsaka av fráveru.

    Næmingur sum ikki møtir til eina próvtøku, má fara til próvtøku komandi próvtøkuskeið, sum sjálvlesandi.

  • PRÓVTØKUFALDARI 2019

    Faldari um próvtøkurnar 2019 er tøkur her hjá næmingum. Faldarin  ervegleiðandi og vendir sær serliga til næmingar á gymnasialum miðámi. Hesin vegleiðingarfaldarin nevnist “Próvtøkuvegleiðing” og sæst her (6. útgáva, dagførd 12. mai 2019)

  • Tal av próvtøkum og ársroyndum

    Á fyrireikingarbreytini skulu næmingar upp í øllum endaligum lærugreinum.
    Á hug-, náttúru- og Búskaparbreytini skulu allir næmingar hava í minsta lagi 8 skrivligar og munnligar próvtøkur tilsamans hesi trý árini, breytaverkætlanin ikki íroknað. Av hesum skulu næmingar helst hava 4 skrivligar próvtøkur, men ikki færri enn tríggjar. Hevur næmingur fleiri enn 4 A-stig, eru sjálvsagt eisini fleiri próvtøkur.

    Hevur næmingur 1 ella 2 eyka lærugreinar á A-stigi, verður samlaða talið av próvtøkum ávikavist 9 ella 10 próvtøkur.

    Fyrsti próvtøkudagur er 20. maj og seinasti próvtøkudagur er 26. juni. Allar próvtøkur og ársroyndir verða kunngjørdar 16. maj, ið er seinasti undirvísingardagur í ár.

    Allir næmingar skulu hava havt tvær próvtøkur, tá annað árið endar.

  • Skrivligar og munnligar próvtøkur og ársroyndir

    Møtiskylda er til allar próvtøkur og ársroyndir. Um næmingur ikki møtir upp og ikki hevur lógliga orsøk til hetta, kann avleiðingin verða, at hann annaðhvørt ikki verður fluttur upp til næsta skúlaár ella, um talan er um seinasta árið á Glasi, fær næmingurin ikki endaligt prógv.

    Lóglig orsøk til ikki at møta upp er t.d. sjúka ella onnur álvarslig viðurskifti kring næmingin. Er næmingur sjúkur, tá próvtøka skal haldast, skal læknaváttan fáast til vega og latast skrivstovuni sama dag. Serligt oyðublað liggur á skrivstovuni til hetta endamál.

    Næmingurin skal sjálvur syrgja fyri at hava alt tilfar við, ið hann ynskir at nýta undir fyrireikingini til munnliga próvtøku, og til skrivligu próvtøkuna.

    Internetatgongdin er avmarkað, tí mugu t.d. s- og ebøkur og annað tilfar verða lagt á telduna,áðrenn próvtøkuna soleiðis, at tað kann nýtast offline.

    Tit verða biðin um at downloada kunningarfaldaran frá heimasíðu okkara á Glasi og leggja hann niður á tykkara teldu, so tit altíð kunnu kaga aftur í reglarnar undir próvtøkuni, um tað er eitthvørt tit koma í iva um.

    Skrivlig próvtøka

    Til skrivligu royndirnar skulu næmingar sita við próvtøkuborðið 30 minuttir, áðrenn royndin byrjar. Næmingar, ið koma aftaná, at upprópið av nøvnum á næmingum er byrjað, sleppa ikki inn til próvtøkuna uttan serligt loyvi frá útbúgvingarstjóranum fyri gymnasialt miðnám.

    Eingin kann fara frá próvtøkuni fyrsta tíman.

    Undir skrivligu próvtøkunum er ikki møguleiki at roykja.

    Hvør næmingur fær sítt ávísta pláss til hvørja próvtøku. Plássávísingin verður løgd á Lesandi GM áðrenn próvtøkuna. Yvirlitið verður eisini sligið upp á skúlanum.
    Innlating fer fram talgilt umvegis eitt serligt tráðleyst net: Wiseflow. Allir næmingar fáa loyniorð og vegleiðing, sum liggur á próvtøkuborðinum hjá hvørjum einstøkum næmingi til hvørja skrivliga próvtøku.

    Allir næmingar hava atgongd til eitt próvtøkunet, sum gevur atgongd til orðabøkur. Próvtøkunetið skrivligar próvtøkur eitur: www.roynd.fo

    Uppgávurnar verða latnar inn við pdf-skjali, og tí skulu tit duga at umgera ein Word-fíl til ein PDF-fil áðrenn próvtøkutíðarskeiðið byrjar.
    Tá próvtøkan er endað, skal eitt eftirlitsfólk tilkallast. Næmingurin verður sitandi, til eftirlitsfólkið hevur kvittað fyri móttøku.Navn og síðutal, umframt samlað síðutal, skal verða tilskilað á allar síðurnar/ørkini. Næmingurin hevur ábyrgda fyri at útfylla próvtøkuumslagið og ørkini/papírini við røttu persónligu upplýsingum. Næmingurin hevur ábyrgdina av, at røttu síðirnar verða latnar inn í umslaginum, sum næmingurin eisini váttar fyri á umslagnum/upploada’ar í WISEflow.
    Næmingur, ið er liðugur og fer úr próvtøkuhølunum, áðrenn próvtøkan er liðug, má lata alt tilfar, telefon og teldan íroknað, verða verandi í próvtøkuhølunum, til próvtøkan er endaliga av og vaktirnar hava eftirkannað, at øll próvtøkusvar eru innlatin.

    Teldur o.a. kunnu avheintast ½ tíma eftir, at alt er liðugt innlatið og upptalt.

    GG: Einki samskifti er loyvt millum næmingar undir próvtøkuni. Einki samskifti við fólk uttanfyri próvtøkuhølini er loyvt. Um hetta kortini fer fram, er avleiðingin burturvísing frá próvtøkuni. Næmingar kunnu tá sleppa til nýggja próvtøku árið eftir.

    Munnlig próvtøka og ársroynd

    Raðfylgjan er sambært næmingalistanum í próvtøkuyvirlitinum.  Vilja tit nakað annað, skulutit í góðari tíð samráðast við lærara um aðra raðfylgju. Próvlærarin ger ein lista við tíðarfesting (møtitíðspunkt, fyrireikingartíðspunkt og próvtøkutíðspunkt), so tað t.d. sæst, hvør møtir áðrenn døgurðasteðg, hvør møtir aftaná, og nær tey síðstu skulu møta.

    Tit skulu møta í góðari tíð áðrennásettu tíðina (umleið 20 min). Próvdómari kann nokta at próvhoyra næming, sum ikki er møttur til tíðina, um hetta førir til, at próvtøkan fer út um ásetta tíðarkarmin.

    Ein munnlig próvtøka er ein samtala millum próvhoyrara og próvtakara, har próvtakarin leggur fyri, um einki annað er ásett.

    Próvdómarin kann uttan loyvi frá próvhoyraranum seta próvtakaranum einstakar spurningar.

    Staðfestur illgruni um óreglusemi við munnligar próvtøkur førir við sær burturvísing frá próvtøkuni. Tí skulu næmingar ikki samskifta við nakran undir fyrireikingini.T.v.s. heldur eingin netnýtsla og eingin fartelefonnýtsla.

    Loyvt er at hava alt undirvísingartilfar við til fyrireiking (undantikið í teimum lærugreinum, har avmarkingar eru ásettar). Til sjálva próvhoyringina er einans loyvt at hava uppskriftirnar, sum eru gjørdar í fyrireikingarhølunum ella, um talan er um 24 tíma fyrireiking, uppskriftir, ið eru fyrireikaðar heima í hesum sambandi.

    Ein beinleiðis upplestur av hesum handriti, telur tað niður í próvtøkudømingini.

  • Longd fyrireikingartíð og próvtøkutíð

    Næmingar kunnu – av ymsum umstøðum – hava tørv á eyka fyrireikingartíð ella longdari próvtøkutíð.  Skúlin kann tá bera so í bandi, at næmingar, sum hava tørv á tí, fáa serligar próvtøkuumstøður, sum javnseta teir við aðrar próvtakarar. Dømi um umstøður, sum kunnu geva serligar próvtøkuumstøður, eru eitt nú orðblindni, talblindni ella aðrir staðfestir trupulleikar, sum kunnu darva. Her skulu næmingar tosa við lestrarvegleiðara og logopediina, sum taka sær av at leiðbeina um hetta.

    Skrivligar próvtøkur – longd próvtøkutíð:

    • Sum meginregla verður í mesta lagi givið 25% afturat vanligu tíðini í eyka tíð til skrivligar próvtøkur.

    Munnligar próvtøkur – longd fyrireikingartíð:

    • Um vanliga fyrireikingartíðin er hálvan tíma ella sttyttri kann næmingurin fáa dupulta fyrireikingartíð (+100%). Tvs. at um fyrireikingartíðin er 30 minuttir, so verður hon 1 tíma.
    • Um vanliga fyrireikinrgartíðin er longri enn hálvan tíma kann næmingurin fáa longt fyrireikingartíðina við einari helvt (+50%). Tvs. at um fyrireikingartíðin er 1 tíma verður hon hálvanannan tíma – 1 tíma og 30 minuttir.

    Rundskriv frá Mentamálaráðnum um serligar próvtøkuumstøður á miðnámi sæst her.

  • Teldur

    Næmingur hevur sjálvur sína egnu teldu við til próvtøku. Tað er næmingsins ábyrgd og bert næmingsins, at telda og onnur tøkni riggar. Um telda ikki riggar, tá royndin byrjar, skulu uppgávurnar skrivast við hond, um talan er um skrivliga próvtøku.

    Gevið gætur, at um hjálpiamboð, ið ikki eru loyvd til próvtøkuna, liggja á telduni, er hetta at rokna sum roynd at svika, og førir til burturvísing.

  • Kærur

    Kærufreist er í seinasta lagi 7. dagin eftir, at próvtøkuúrtslitið er kunngjørt næminginum. Tosið við lestrarvegleiðara um hetta.

  • SJÚKRAROYND - oyðublað

    Her er oyðublað at útfylla í sambandi við sjúku undir prótøku. Útfyll skjalið talgilt og send til teldupostadressuna, sum er upplýst í skjalinum (post@glasir.fo). Oyðublaðið kann heintast her

  • VEGLEIÐING: TÁ ILLGRUNI ER SVIK TIL PRÓVTØKU

    ambært Próvtøkukunngerðini skal próvtøkusvar vera próvtakarans egna sjálvstøðuga svar. Um próvdómari fær illgruna um, at næmingur hevur útvegað sær hjálp, hjálpt øðrum, latið avrik hjá øðrum inn sum sítt egna ella endurnýtt áður dømt avrik, skulu teir boða leiðara útbúgvingarstovnsins frá hesum. Umráðandi er, at próvdómarin í síni fráboðan vísir nágreiniliga á, hvat og hvar mistanki er um svik. Próvdómarin skal tó kortini próvdøma uppgávuna og geva próvtal. Leiðari útbúgvingarstovnsins skal síðani kanna málið. Um staðfest verður, at viðkomandi próvtakari hevur svikað, skal hann vísast burtur frá próvtøkuni. Er avgerð rektarans hinvegin, at alt er farið rætt fram, verður givna próvtaliðstandandi.

    Hetta merkir, at tað er uppgávan hjá próvdómaranum at vísa á illgruna og boða rektaranum í viðkomandi skúla, har próvtakarin hoyrir til, frá hesum og geva próvmet. Uppgávan hjá rektaranum er at kanna, um næmingurin veruliga hevur svikað. Hetta kann t.d. gerast við at kanna málið og tosa við næmingin. Verður illgrunin staðfestur, skal próvtakarin sum nevnt burturvísast frá próvtøkuni.

    Viðmerkjast skal, at um rektarin tekur avgerð um burturvísing, er talan um avgerðsbrt. § 2 í fyrisitingarlógini, og tískil skal próvtakarin partshoyrast áðrenn avgerðin verður tikin. Harumframt skal avgerðin vera grundgivin, og próvtakarin skal vegleiðast um møguleikan at kæra avgerð rektarans til Mentamálaráðið.

    MANNAGONGDIN Í STUTTUM:

    • Próvdómari fær illgruna um svik
    • Próvdómari gevur próvtal og skrivar frágreiðing
    • Próvdómarin sendur rektaranum próvtalið saman við frágreiðingini
    • Rektarin kannar málið og tekur avgerð
    • Próvtalið fellur burtur ella verður staðfest, alt eftir avgerð rektarans
    • Um avgerð rektarans er burturvísing, skulu fyrisitingarligar mannagongdir fylgjast. Tað vil siga, at næmingurin skal parthoyrast (við 5 daga hoyringsfreist), fáa grundgeving fyri avgerðini og fáa kæruvegleiðing