Onki úrslit

HJARTALIGA VÆLKOMIN Á GLASIR

Eitt spennandi skúlaár kann standa tykkum fyri durum. Vit ynskja okkum at læra tykkum at kenna og vóna, at tit koma at trívast, læra og mennast.

Glasir er Føroya størsti útbúgvingarstovnur. Her ganga umleið 1.500 næmingar og lesandi, og vit hava eitt stórt og breitt úrval av útbúgvingum, bæði á miðnámi og eftir miðnám. Á Glasi skal vera rúm fyri øllum, og øll skulu kenna seg væl. Í hesari síðuni er kunning um mannagongdir, leiðreglur og aðrar viðkomandi upplýsingar.

Á Glasi stremba vit eftir at gera umstøðurnar fyri at læra so góðar, sum yvirhøvur gjørligt. Tá tú hyggur aftur á tína útbúgvingartíð, vóna vit, at tíðin á Glasi stendur sum nakað heilt serligt, bæði fakliga og persónliga. Fyri at tað skal bera til er alneyðugt, at tú sjálv/ur tekur ábyrgd og ert virkin í undirvísing, samskifti og tiltøkum á skúlanum. Á Glasi hevur tú bestu fortreytir fyri at læra, og okkara ynski er, at tú gagnnýtir tær til fulnar. Øll læring er viðkomandi, so lat sinnið upp og legg í vaðið.

SAMBAND MIILLUM NÆMING OG LÆRARA

Á Glasi leggja vit dent á, at lærarar okkara bæði hava holla fakliga vitan, og at teir námsfrøðiliga eru brynjaðir til at miðla fakligu vitanina neyvt til okkara næmingar og lærlingar. Her er sambandið millum lærara og næming avgerandi. Um vit hava fyrilit fyri hvørjum øðrum, virða hvønn annan og tað arbeiðið vit gera, er eyðsæð, at sambandið millum næming og lærara gerst gott, og tá eru bestu fortreytir fyri, at tú lærir nakað, og at undirvísingin kann eydnast.

Sum næmingur mást tú vísa hug at læra, fyrireika teg til tímarnar og verða virkin í undirvísingini. Tá er grundarlag fyri at menna sambandið millum teg og faklærarar tínar, soleiðis at tú mennist fakliga og lærir sum mest.

Floks- og kjarnutoymi

Eitt kjarnutoymi er knýtt at tínum flokki. Fyri flokkar á fyrsta ári eru lestrarvegleiðari floksins og tveir lærarar í kjarnutoyminum. Tann eini av hesum trimum er toymissamskipari. Uppgávan hjá kjarnutoyminum er at fremja og samskipa læring í flokkinum og røkja trivnaðin hjá tær sum næmingi ella lærlingi. Kjarnutoymið samskiftir og samstarvar við hinar lærarar floksins fyri at tryggja, at arbeiðsbyrðan er javnt býtt yvir árið og at samstarv er millum lærugreinar. Toymið tekur viðurskifti upp við flokkin, sum kunnu betrast og kann veita hjálp og vegleiðing um fakligar og persónligar avbjóðingar, ið stinga seg upp. Toymið skipar tykkara fyrsta skúladag. Niðanfyri er yvirlit yvir, hvør er í kjarnutoyminum fyri flokkarnar á fyrsta ári.

Umframt kjarnutoymi er eisini eitt flokstoymi knýtt at hvørjum flokki. Í flokstoyminum eru allir lærarar floksins.

 

 

NÆMINGARÁÐ

Á Glasi eru um 1.500 næmingar, lærlingar og lesandi. Skúlin er til fyri tykkum, og tí er sjálvsagt, at tit hava ávirkan á, hvat fyriferst á skúlanum. Hvør flokkur skal velja eitt floksumboð, sum er hevur beinleiðis samstarv og samskifti við næmingaráðið.

Næmingaráðið er tykkara formliga málgagn. Tit velja sjálvi umboðan á næmingaráðsvalinum tann 23. september 2022. Næmingaráðið skal í samstarvi við leiðslu, lærarar og onnur starvsfólk røkja áhugamál tykkara á Glasi. Fyri at fáa ein góðan og virknan skúla er tað umráðandi, at tit gera tykkara ávirkan galdandi. Tað kunnu tit eitt nú gera við at stilla upp til næmingaráðið.

Les meira um næmingaráðið her.

Næmingaráðið – mai, 2022

NÆMINGATÆNASTA

NÆMINGATÆNASTAN
Endamálið við næmingatænastuni á Glasi er at tryggja, at allir næmingar, lærlingar og lesandi á Glasi fáa tann serfakliga stuðul, ta vegleiðing og hjálp, sum teimum tørvar, fyri at útbúgvingartíðin á Glasi verður so góð sum yvirhøvur gjørligt.

Við nýggum floksfeløgum, nýggjum lærarum og í nýggjum umhvørvi kann tað vera avbjóðandi bæði at finna runt í øllum hesum nýggja og samstundis leita tær hjálp, stuðul og vegleiðing, um tú hevur tørv á tí. Á Næmingatænastuni hava vit tí samskipað allar tænasturnar, so alt er savnað á einum stað. Umframt at veita eina hond við praktiskum spurningum hjálpir Næmingatænastan eisini við at styrkja fakligu og sosialu menning tína.

Næmingatænastan á Glasi fevnir um lestrarvegleiðing, sálarfrøðing, lesi- og skrivitænastu og bókasavn. Tað ber altíð til at koma inn til eitt prát, og eru spurningar ella ivamál ber til at seta teg í samband við okkum. Vit eru í hølum 410 og 411 á 4. hædd.

Lestrarvegleiðingin

Ein lestrarvegleiðari er knýttur at hvørjum flokki og fylgir tykkum alt skúlaskeiðið. Lestrarvegleiðarin avgreiðir ymsar uppgávur fyri- og saman við tær og flokki tínum. Millum hesar eru:

  • at viðgera og avgreiða umsóknarbløð til studning og lán
  • at kunna um møguleikar fyri víðari útbúgving ella arbeiði
  • at tosa um viðurskifti, ið eru tengd at útbúgvingini
  • saman við kjarnutoyminum at undirvísa flokkum á fyrsta ári í lestrarmenning – ein lærugrein, sum leggur tær lag á í skúlagongdini

Tú kanst venda tær til lestrarvegleiðara tín um bæði útbúgvingarlig-, fíggjarlig-, sosial- og persónlig viðurskifti. Lestrarvegleiðarin hevur – eins og øll starvsfólk – tagnarskyldu.

Sálarfrøðitænastan

Endamálið við sálarfrøðitænastuni er, at gera næmingarnar betur førar fyri at gjøgnumføra miðnám, hóast møguligar sálarligar forðingar ella avbjóðingar. Hendan tænastan kann verða viðkomandi fyri teg, um tú skuldi kent tørv á hjálp, stuðli, vegleiðing, motivatión og orku til at megna útbúgvingina á best møguligan hátt.

Sálarfrøðitænastan kann eisini veita vegleiðing til at fáa gjøllari hjálp, um tørvur er á tí. Samband við sálarfrøðitænastuna fæst umvegis lestrarvegleiðaran.

Lesi- og skrivitænastan (LST)

Okkara orðblindalærarar og audiologopedar arbeiða við at skapa eitt gott og mennandi læringsumhvørvi fyri næmingar, lærlingar og lesandi á Glasi, ið hava orðblindni ella avbjóðingar við lesing, staving og/ella skriving. Endamálið er, at hesi skulu hava møguleika at taka lut í undirvísingini á jøvnum føti við floksfelagarnar.

Í innleiðsludøgunum verða næmingar kunnaðir um lesi- og skrivitænastuna. Lesi- og skrivitænastan (LST) miðjar ímóti, at næmingar, ið hava avmarkaðar lesi- og skriviførleikar skulu fáa neyðugu hjálpiamboðini so skjótt sum gjørligt. LST heldur til í høli 410 á 4. hædd

Snúgva tíni viðurskifti seg um annan serligan tørv, skalt tú taka málið upp við lestrarvegleiðingina skjótast gjørligt, so tú kanst fáa hjálp og vegleiðing beinan vegin.

Her sæst, nær lestrarvegleiðararnir og LST eru at hitta.

Bókasavnið og bókavørðir

Bókasavnið á Glasi er á 2. hædd. Bókasavnið veitir næmingum og lærarum tilfar og hjálp við at leita eftir tilfari til uppgávur, knýttar at undirvísingini. Týsdagar, mikudagar og hósdagar millum kl. 15:30 og 17:00 er lektiukafé á økinum við bókasavni. Bókavørðir eru Anna-May Djurhuus, Paula Gaard, Sanna Maria Klein og Sigurd Nordendal.

SKÚLAÁRIÐ

Klokkutíðir, undirvísing og virksemi uttan fyri vanligu tímatalvuna
Á Glasi nýta vit dupulttímar (90 min.). Hvør dupulttími verður róptur blokkur.

Klokkutíðirnar eru hesar

07:00 – 08:00 morgunmatur kann keypast í kantinuni

08:10 – 09:40 1. blokkur

09:40 – 10:05 steðgur

10:05 – 11:35 2. blokkur

11:35 – 12:10 døgurðasteðgur

12:10 – 13:40 3. blokkur

13:40 – 13:55 steðgur

13:55 – 15:25 4. blokkur

15:25 – 15:30 steðgur

15:30 – 17:00 5. blokkur, mánadag og týsdag, um lærarar/næmingar hava tørv á tí

17.00 – 18.30 6. blokkur

Nær er undirvísing

Tímatalva er skipað frá 1.-4. blokk, men tað er javnan undirvísing í 5. blokki (mánadag-týsdag). Um felags virksemi ella undirvísing verður fyriskipað henda blokk, hava næmingar møtiskyldu.

Lektiukafé og virksemi uttan fyri tímatalvuna
Fyri at gera læringsumhvørvið á Glasi spennandi og fjølbroytt verður skipað fyri ymiskum tiltøkum, ið víkja frá vanligu tímatalvuni í og uttan fyri skúlatíð. Vit kunnu nevna felagstímar, framsýningar, fyrilestrar, verkætlanir, temadagar, námsferðir, virkis- og stovnsvitjanir. Á Glasi kann eisini vera ymiskt frítíðarvirksemi, eitt nú innan myndlist, tónleik og teldu. Næmingar hava møtiskyldu til tiltøk, ið eru skipað í skúlatíðini.

Á Glasi er eisini lektiukafé, har tú kanst leita tær hjálp, t.d. í samband við innlatingar. Lektiukafé er eftir vanligu skemaløgdu undirvísingina.

Frítíð og frídagar skúlaárið 2022-2023

08/10 – 16/10          Heystfrí

22/12 – 02/01          Jólafrí

01/04 – 10/04         Páskafrí

25/04                         Flaggdagur

05/05                         Dýri biðidagur

12/05                          Síðsti undirvísingardagur á gymnasialum miðnámi

18/05                         Kristi himmalsferðardagur

29/05                         2. Hvítusunnudagur

22/06                        Prógvhandan

23/06                        Seinasti skúladagur.

 

Blokkdagar
Á gymnasialum miðnámi eru blokkdagar; tá hava tit somu lærugrein ein heilan dag. Tað eru 4 blokkdagar hvørt skúlaár. Skúlaárið 2022/2023 verða blokkdagarnir:

1. blokkdagur: 20. oktober 2022 – vika 42
2. blokkdagur:  17. november 2022 – vika 46
3. blokkdagur: 12. januar 2023 – vika 2
4. blokkdagur: 9. februar 2023 – vika 6

Fyrsta blokkdagin verður undirvíst allan dagin í tí lærugrein, sum liggur fyrsta blokk hósdag í stakari viku. Annan blokkdag verður undirvíst allan dagin í tí lærugrein, sum liggur í øðrum blokki, o.s.fr. Blokkdagarnir eru allir sama vikudag – hósdag.

LEIÐSLA, SKIPANIR OG KUNNING

Útbúgvingarleiðslan

Á Glasi eru útbúgvingarstjórar, sum varða av útbúgvingunum, næmingunum og lærlingunum, eitt nú tiltøkum og kunning um vallærugreinir. Útbúgvingarstjórarnir halda til í høli 407.1 og 408 á 4. hædd. Útbúgvingarstjórarnir hava ábyrgd fyri, at útbúgvingarnar lúka øll galdandi krøv, fyri støðugt at menna útbúgvingarnar og at tryggja, at næmingar, lærlingar og lesandi fáa dygdargóða og mennandi undirvísing og  halda sínar lestrarskyldur.

Una Joensen er útbúgvingarstjóri fyri gymnasialt miðnám (høli 407.1). Magni á Lakjuni er útbúgvingarstjóri fyri yrkis- og vinnurættað miðnám (høli 408). Á Glasi eru eisini útbúgvingar á hægri nám. Her er Finn Jensen dekanur.

Samskiftis- og KT-skipanir

Á Glasi hava vit ymiskar samskiftis- og KT-skipanir. Hvør næmingur/lærlingur fær brúkaranavn og login sendandi. Hetta gevur atgongd til taldgildu skipanirnar – teldupost, tímatalvu, skráseting av uppmøting og innlatingum og neyðug forrit. Tú hevur skyldu at rita teg inn á neyðugu skipanirnar dagliga, tí øll kunning verður send tær talgilt.

Kjarnutoymið kunnar tykkum nærri um skipanirnar. Á leinkinum her fæst eisini vegleiðing um KT. Tú ritar teg inn á talgildu skipanirnar ovast í vinstra horni á heimsíðuni glasir.fo.

SKILHALDSREGLUR

Vit heita inniliga á tykkum um at halda skilhaldsreglurnar. Hetta fremur trivnaðin hjá okkum øllum.

Rudding

Gott, um tit næmingar og lærlingar javnan kunnu minna hvønna annan á, at tit hava skyldu at halda skúlan og økið kring skúlan ruddiligt. Hetta merkir, at skúlastovur, kantinur og onnur øki skulu ruddast eftir hvørja nýtslu: burturkast skal í ruskíløt, og borðbúnaður skal berast upp á pláss. Serliga grov brot á hesa áseting verða at meta sum herverk. Sambært skilhaldsreglum skúlans, kunnu serliga grov brot hava við sær burturvísing í upp til 10 dagar. Herverk, sum er brot á revsilógina, verður meldað til avvarðandi myndugleika.

Happing

Einki slag av happing verður tolt á Glasi. Hetta merkir millum annað, at vit vísa hvørjum øðrum virðing og leggja æru í at stuðla og hjálpa hvørjum øðrum. Øll hava skyldu at boða frá, um onkur verður happað/ur í atburði, við orðum, á netinum ella á annan hátt, so happingin kann basast, og øll kunnu trívast.

Bjargingarop

Í teimum skúlastovum, har atgongd er út á tekjurnar gjøgnum vindeyguni, er strangliga bannað at fara út á tekjurnar – uttan í neyðstøðu.

Royking

Á Glasi ynskja vit at hava eitt roykfrítt umhvørvi. Tí er royking bannað á øllum økjum skúlans. Einastu undantøk eru tilskilaðu roykirúmini, sum finnast

  • Við høvuðsbygningin: yvirav inngongdini á hædd 3 niðanfyri verkstøðini (við síðuna av tjaldhøllini, sum verður sett upp eftir skúlabyrjan 2021)
  • Við bygning 700 (Handilsskúlin): frámerktur roykiskúrur á norðursíðuni, sum vendir móti bygning 800 (Skúlaheimið)

Um næmingur roykir á øðrum økjum á skúlanum, kann hetta føra til burturvísing frá undirvísing í ein dag og skrásett sum frávera.

Telefonir, teldlar og teldur

Telda er vanligt undirvísingaramboð og verður nýtt dagliga. Lærarin ger av, nær teldur og onnur útgerð verður nýtt í undirvísingini. Reglugerð í samband við nýtslu av teldu o.l. er annars henda:

  • næmingurin hevur egna teldu við til undirvísing og til próvtøku. Teldur kunnu tó bara nýtast í undirvísingini, tá lærarin loyvir tí
  • næmingurin hevur sjálvur tøkniliga ábyrgd av egnari teldu
  • næmingurin fær ókeypis atgongd til Office-pakkan, so leingi hann er lestrarvirkin
  • tað er bannað at taka ólógligt tilfar niður, sum til dømis er fevnt av upphavsrættindum.

Sambært skilhaldsreglum skúlans, kunnu serliga grov brot hava við sær burturvísing í upp til 10 dagar. Herverk, sum er brot á revsilógina, verður meldað til avvarðandi myndugleika.

Skilhalds- og lestrarskyldur tínar eru síggjast í fullari longd her.

NÆMINGAFALDARIN 2022/23

Tú kann síggja næmingafaldarn fyri 2022/23 her