SKILHALDSREGLUR Á GLASI

(dagførdar 14. august 2024)

1. Lestrar- og skilhaldsreglur á Glasi

Á Glasi vilja vit, at næmingar og lærlingar skulu røkka málinum við útbúgvingini, og lestrar- og skilhaldsreglurnar eru til fyri at stuðla hesum. Vit raðfesta menning av læring og sosialum førleikum í einum dynamiskum og skapandi umhvørvi.

Lestrar- og skilhaldsreglurnar eru settar í gildi fyri at geva øllum næmingum, lærlingum og starvsfólki á Glasi góðar umstøður at virka undir, og fyri at tær skulu vera karmur um eitt gott læringsumhvørvi.

Lestrar- og skilhaldsreglurnar eru gjørdar við heimild í kunngerð nr. 5 frá 22. januar 2013 um lestrar- og skilhaldsreglur í gymnasialu miðnámsútbúgvingunum, sum er tøk her, og kunngerð nr. 83 frá 4. juni 2013 um felagsreglur í yrkisnámi, kap. 5 um skyldur og skilhald, sum er tøk her. Hesar reglur hava verið til hoyring í lærararáðnum og næmingaráðnum, og eru góðkendar av Undirvísingarstýrinum.

Lestrar- og skilhaldsreglurnar áseta mannagongdir fyri skilagóðari atferð. Reglurnar lýsa mannagongdir skúlans, skyldur næmingsins, og hvørji agatiltøkini kunnu verða, um hann ikki heldur hesar. Allir næmingar og lærlingar hava skyldu til at seta seg inn í hesar reglur og fylgja teimum. Næmingar og starvsfólk eru kunnaði um reglurnar, sum eisini standa á heimasíðu skúlans.

Lestrar- og skilhaldsreglurnar eru galdandi bæði inni á Glasi og í ávísum førum uttanfyri Glasir, m.a. tá farið verður á útferð, at vitja stovnar, virkisvitjan, námsferð og tílíkt.

2. Lestrarvirkni og innlatingar 

Vit vænta, at næmingar eru til staðar og luttaka í undirvísingini og øllum virksemi, ið er knýtt at undirvísingini á Glasi.

Hetta merkir, at á Glasi hava allir næmingar og lærlingar møtiskyldu alt skúlaárið til tað virksemið, sum skúlin skipar fyri. Møtiskylda er til allar vegleiðingar, próvtøkur og royndir hjá skúlanum.

Møtiskylda er eisini til undirvísing 5. blokk mánadag og týsdag, um lærari leggur undirvísing har. Eftir avtalu við næmingar kann undirvísing eisini leggjast aðrar tíðir.

Næmingar og lærlingar hava skyldu til at vera virknir í undirvísingini/útbúgvingartíðini, og hetta merkir millum annað at:

 vera fyrireikaður, sum m.a. kann merkja, at næmingur hevur skaffað sær/ogna sær tað tilfar, sum verður brúkt í undirvísingini

• vera til staðar og vera virkin
• luttaka í øllum fyriskipaðum tiltøkum í sambandi við undirvísingina, sum t.d. fyrilestrum, vitjanum, námsferðum, temadøgum, royndum og próvtøkum
• taka ábyrgd og vísa virðing fyri næmingum, lærarum og undirvísingarstøðuni
• dagliga at halda seg kunnaðan á telduposti skúlans og samskiftispallum annars um skúlating, skemabroytingar og annað. Skúlating verða givin í Tímaglasinum

2.1 Frávera og innlatingar 

Næmingar og lærlingar hava skyldu at møta til alla undirvísing. Um næmingur kemur ov seint, men tó áðrenn 20 minuttir eru farnir, verður næmingurin skrásettur sum ov seinur, og hann fær gulan blokk. Um næmingurin er meira enn 20 minuttir ov seinur, verður næmingurin skrásettur sum fráverandi, og næmingurin fær reyðan blokk. Um næmingur fer, áðrenn blokkurin er liðugur, fær hann gulan blokk, um tað eru minni enn 20 minuttir eftir av blokkinum og reyðan blokk, um tað eru meira enn 20 minuttir eftir.

Um næmingur ikki luttekur í undirvísing og/ella órógvar í tímunum, so hetta gongur útyvir úrtøkuna hjá øðrum næmingum í flokkinum, kann lærari koyra næming út úr flokkinum og geva honum gulan ella reyðan blokk.

Tá næmingurin hevur tríggjar gular blokkar, verður skrásetingin broytt til reyðan blokk. Um fráveran gerst ov høg, verða agatiltøk sett í verk samb. pkt. 2.5.

Eftir umsókn kann næmingur sleppa undan ella partvíst sleppa undan skylduni at vera til staðar, um rektarin metir, at næmingurin ikki er likamliga virkisførur ella av øðrum orsøkum eigur at fáa játtað frítøku.

Næmingar og lærlingar hava skyldu at lata allar uppgávur inn rættstundis. Allar innlatingar skulu lúka ásettu krøv í dygd og vavi. Fyri at næmingurin skal kunna leggja skrivliga arbeiðið til rættis, skal lærarin lata næminginum

uppgávuna í seinasta lagi 7 dagar áðrenn, uppgávan skal latast inn. Um uppgávan er mett til 4 tímar í næmingatíð ella meira, skal uppgávan latast næminginum í seinasta lagi 14 dagar áðrenn, hon skal latast inn.

Innlatingar, sum skulu latast inn talgilt, verða latnar inn umvegis Moodle. Um næmingurin ikki letur uppgávur inn rættstundis, verður hon skrásett sum frávera.

Lærari skal í seinasta lagi kl 16 dagin fyri geva næmingum boð um skúlating.

Um fráveran samanlagt (t.e. frávera og manglandi innlatingar) fer upp um 10 prosent ella upp um 15 prosent í einstakari lærugrein, fær næmingurin skrivliga námsfrøðiliga áminning/ábreiðslu fyri brot á lestrar- og skilhaldsreglur skúlans og boð um at tosa við lestrarvegleiðingina.

Um áminningin/ábreiðslan ikki verður tikin til eftirtektar, verður skrivlig ávaring givin.

Um næmingurin hevur fráveru, sum samanlagt er 20 prosent ella hægri, kann fráboðan verða send Studna um, at næmingurin ikki er lestrarvirkin og missir rættin til at fáa studning. Næmingurin verður mettur at vera lestrarvirkin aftur, um fráveruuppgerðir seinni vísa hetta.

Verður skrivliga ávaringin ikki tikin til eftirtektar, kann næmingurin verða burturvístur. Er talan um lærling, sum verður burturvístur, kann lærusáttmálin fellur burtur.

Í teimum førum har fráveran er serliga stór í einstakari endaligari lærugrein við ársenda, hóast samlaða fráveran er undir 10 prosent, kann rætturin til at luttaka í og fara upp til próvtøku í hesari lærugrein verða tikin frá einum.

Næmingurin kann flyta upp í næsta flokk, men kann ikki fara til próvtøku í nevndu lærugreinini fyrr enn árið eftir.

Frávera og innlatingar verða skrásettar í Tímaglasinum. Næmingar og lærlingar skulu hava møguleika at hava eftirlit við egnari fráveru í Tímaglasinum og skulu kunna gera viðmerkingar til hesa. Næmingar hava skyldu at møta til innkallaðar samrøður við lestrarvegleiðara ella rektaran um fráveru. Næmingar og lærlingar kunnu altíð tosa við lestrarvegleiðaran um sína fráveru.Næmingar á gymnasialum miðnámi skulu lata eina breytaruppgávu inn, sum líkur krøvini til eina slíka. Um næmingur ikki letur breytaruppgávu inn, sum lýkur ásett krøv til ásetta tíðarfreist, sum skúlin setur, kann næmingur ikki fara til próvtøku í tí skúlaárinum, men má bíða til árið eftir. Næmingurin fær møguleika at skriva ein breytaruppgávu árið eftir, tá næmingar skriva breytaruppgávu. 

2.2 Próvtøkur og royndir 

Til próvtøkur og royndir eru lestrar- og skilhaldsreglurnar eisini galdandi, umframt tær reglur, sum eru galdandi fyri próvtøkur og royndir, sum øll fáa, áðrenn hesar verða hildnar.

Næmingar og lærlingar hava ábyrgd av, at teldan riggar, at dátur verða goymdar, og at røtt skjøl verða latin inn.

Næmingar hava møtiskyldu til allar royndir, sum skúlin fyriskipar. Møtir ein næmingur ikki til eina av skúlanum fyriskipaðaða roynd, verður víst til agatiltøkini fyri brot á reglurnar um lestrarvirkni og innlatingar samb. pkt 2.5. Næmingur, sum ikki møtir til eina roynd, skal møta til eina nýggja roynd, sum verður ásett av skúlanum.Næmingar hava møtiskyldu til allar royndir, sum skúlin fyriskipar. Møtir ein næmingur ikki til eina av skúlanum fyriskipaðaða roynd, verður víst til agatiltøkini fyri brot á reglurnar um lestrarvirkni og innlatingar samb. pkt 2.5. Næmingur, sum ikki møtir til eina roynd, skal møta til eina nýggja roynd, sum verður ásett av skúlanum.

2.3 Snýt

Øll skrivlig avrik skulu vera næmingsins egnu. Um næmingurin letur avskrivað avrik inn, er hetta tað sama sum at snýta. Um næmingur brúkar tilfar, sum onnur hava skrivað, sum part av sínari innlating, skal tað gerast við tilvísing. Um hann ikki ger tað, er tað somuleiðis snýt. Um ein innlating ikki er næmingsins egna, verður henda skrásett sum ikki latin inn – t.e. frávera.

Um lærari hevur illgruna um snýt í sambandi við eina innlating, skal hann tosa við næmingin um hetta. Verður illgrunin staðfestur, hevur lærarin eina samrøðu við næmingin. Lærarin kunnar næmingin um, at uppgávan ikki verður skrásett sum innlatin, og hann kunnar somuleiðis um, at um hetta brotið á skilhaldsreglurnar endurtekur seg, verður málið sent til rektaran, sum kann seta agatiltøk í verk.

Um illgruni er um snýt til próvtøku ella roynd, meðan próvtøkan fer fram ella seinni, skal rektarin hava fráboðan um hetta. Snýt undir próvtøku er ein skerpandi/herðandi umstøða. Verður illgrunin staðfestur, verður próvtakarin vístur burtur frá avvarandi próvtøku og fær eina ávaring. Møgulig próvtøl detta burtur og næmingurin fær møguleika at fara til nýggja próvtøku skúlaárið eftir. Verður snýt staðfest, og næmingurin frammanundan hevur eina ávaring fyri snýt, kann næmingurin burturvísast og skrivast út úr skúlanum.Um illgruni er um snýt til próvtøku ella roynd, meðan próvtøkan fer fram ella seinni, skal rektarin hava fráboðan um hetta. Snýt undir próvtøku er ein skerpandi/herðandi umstøða. Verður illgrunin staðfestur, verður próvtakarin vístur burtur frá avvarandi próvtøku og fær eina ávaring. Møgulig próvtøl detta burtur og næmingurin fær møguleika at fara til nýggja próvtøku skúlaárið eftir. Verður snýt staðfest, og næmingurin frammanundan hevur eina ávaring fyri snýt, kann næmingurin burturvísast og skrivast út úr skúlanum.

2.4. Um at flyta upp í flokk

Tá skúlaárið er liðugt, verða miðalkarakterir og lestrarvirkni hjá næmingum gjøgnumgingið. Um miðalkarakterurin er undir 2,0 og mett verður, at lestrarvirknið ikki er nøktandi, ger leiðslan eina meting um, hvørt næmingurin kann verða fluttur upp í næsta flokk.

2.5 Agatiltøk fyri brot á reglurnar um lestrarvirkni og innlatingar  

Agatiltøk skulu vera rímilig í mun til framda brotið. Brot á reglurnar í sambandi við lestrarvirkni og innlatingar kunnu hava við sær, at næmingur/lærlingur:

• Fær eina áminning/ábreiðslu og boð um at bøta um støðuna  
• Fær skrivliga ávaring við boðum um at bøta um støðuna
• Missir studningin orsaka av manglandi lestrarvirkni  
• Missir rættin at fara til próvtøku
• Verður burturvístur

Um skúlin nýtir agatiltøk móti næmingi ella lærlingi, sum er undir 18 ár, verða foreldur/avvarðandi kunnað. Er talan um lærling, verður lærumeistarin eisini kunnaður.

3. Skilhaldsreglur 

Skilhaldsreglur eru reglur, ið m.a. fevna um góðan atburð, samveru og virðing.

Vit vænta, at næmingar hava virðing fyri og vísa ábyrgd í øllum skúlatongdum høpi, bæði inni á Glasi og uttanfyri Glasir.

Glasir skal vera eitt gott stað hjá øllum at vera. Á Glasi er vítt til veggja og høgt til loftið, og her hava vit frælsi við ábyrgd. Hetta merkir, at øll vísa vanligan fólkaskikk mótvegis øðrum næmingum, starvsfólki og bygninginum. Vit virða hvønn annan, vit virða sjónarmiðini hjá hvørjum øðrum og vit tosa siðiliga við og um hvønn annan. Vit fara væl um allar ognir á Glasi.

Góður atburður á Glasi er m.a. at:

• Vera við til at skapa eitt trygt og gott læringsumhvørvi  
• Hava umsorgan fyri tí einstaka og fyri felagsskapinum
• Fara væl um bygningin, innbúgv, amboð og annað tilfar  
• Vera eitt virðiligt umboð fyri Glasir
• Vísa virðing og tolsemi
• Vera við til at loysa ósemjur við jaligum samskifti

3.1 Happing 

Niðrandi tala og sálarligur- og likamligur harðskapur verður undir ongum umstøðum góðtikin á Glasi. Einki slag av happing verður góðtikið. Tað verður ikki góðtikið, at nakar happar, er kúgandi, særandi ella mannminkandi í orðum ella atburði. Hetta merkir millum annað, at vit vísa hvørjum øðrum virðing og leggja æru í at stuðla og hjálpa hvørjum øðrum. Øll hava skyldu at boða frá, um onkur verður happað/-ur við atburði, við orðum, á netinum ella á annan hátt, so happingin kann basast, og øll kunnu trívast.

3.2 Rudding 

Tað er ein felags ábyrgd hjá øllum at halda skúlan og økið kring skúlan reint og ruddiligt. Skúlastovur skulu ruddast eftir hvønn blokk. Seinnapartin skulu stólarnir heingjast upp undir borðini eftir hvønn blokk. Øll hava skyldu til at rudda eftir sær sjálvum á verkstøðum, starvsstovum, ítróttarhøllini og øðrum undirvísingarrúmum.

Tað er somuleiðis ábyrgd hjá øllum at halda felagsøkini rein og ruddilig – tað er t.d. í kantinuni, á bókasavninum, á næmingaøkjum, á svalunum og á økjunum kring skúlan.

3.3 Herverk 

Herverk verður undir ongum umstøðum góðtikið. Herverk er m.a. tilvitað at gera seg inn á innbúgv, amboð, hølir og ognir skúlans. Herverk, sum er brot á revsilógina, verður meldað til avvarðandi myndugleika.

3.4 Royking 

Royking, snús og nýtsla av øðrum tubbaksúrdráttum er bannað á øllum økjum á Glasi undantikið í frámerktum skúrum.

3.5 Gjøld 

Næmingar á gymnasialum miðnámi

Allir næmingar, sum ganga á gymnasialum miðnámi á Glasi, gjalda árliga eitt gjald á 475 krónur. Hetta gjaldið er fyri ljósrit, útprenting og annað tilfar, sum verða nýtt í undirvísingini.

Næmingar, sum byrja á Glasi, skulu gjalda áðrenn fyrsta undirvísingardag. Tá nýggir næmingar boða skúlanum frá, um teir taka av tilboðnum um at byrja á Glasi, skulu teir samstundis vátta, at teir gjalda næmingagjaldið. Tá henda váttan er skrásett, verður næmingurin skrásettur á Glasi.

Næmingar, sum ganga á Glasi, og sum fara upp í næsta flokk, skulu gjalda í seinasta lagi 15. september í skúlaárinum. Næmingur, sum gevst á Glasi áðrenn 15. september, fær næmingagjaldið afturgoldið.

Næmingar og lærlingar á yrkisnámi

Fyri næmingar og lærlingar, sum ganga á yrkisnámi, er gjaldið ymiskt frá útbúgving til útbúgving. Hesir næmingar og lærlingar fáa við upptøku ella innkalling boð um, hvat gjaldið er. Yvirlit yvir hesi gjøld er eisini tøkt á heimasíðuni.

Næmingar og lærlingar, sum byrja á Glasi, skulu gjalda áðrenn fyrsta undirvísingardag. Tá nýggir næmingar og lærlingar boða skúlanum frá, um teir taka av tilboðnum um at byrja á Glasi, skulu teir samstundis vátta, at teir gjalda næmingagjaldið. Tá henda váttan er skrásett, verður næmingurin og lærlingur skrásettur á Glasi.

Næmingar og lærlingar, sum ganga á Glasi, og sum fara upp í næsta flokk, skulu gjalda í seinasta lagi 15. september í skúlaárinum. Næmingur og lærlingur, sum gevst á Glasi áðrenn 15. september, fær næmingagjaldið afturgoldið.

3.6 Rúsevni og rúsdrekka 

Tað er strangliga bannað at nýta rúsdrekka ella nýta rúsevni á Glasi, eins og tað er strangliga bannað at vera ávirkaður av rúsdrekka ella rúsevnum. Hetta er eisini galdandi í skúlatongdum virksemi uttanfyri skúlan, sum t.d. á námsferðum.

Rektarin kann í serligum førum, sum t.d. til veitslur, geva undantak til at nýta rúsdrekka.

3.7 Myndir og upptøkur 

Ikki er loyvt at taka myndir ella gera films-/ljóðupptøkur av næmingum ella starvsfólkum uttan loyvi. Tað er heldur ikki loyvt at senda myndir og upptøkur víðari til onnur uttan samtykki.

3.8 Matur og drekka 

Matur, sum krevur borðisk og borðbúna, skulu næmingarnir eta í kantinuøkinum. Tað er ikki loyvt at eta í undirvísingarhølunum. Leiðslan kann í ávísum førum geva undantak.

3.9 Telefonir, teldlar, teldur og líknandi útgerð

Á Glasi er ikki loyvt at hava telefon og aðra líknandi útgerð hjá sær, meðan tað er undirvísing. Allir næmingar hava skyldu til at hava teirra telefonir sløktar ella setta í flogstøðu. Telefonirnar skulu leggjast í skápið í hølunum, áðrenn ein undirvísingartími byrjar. Tað er ikki loyvt at aktivera “internet-deiling” á telefonini. Lærari kann hendingavís geva loyvi til at brúka telefon til ávíst undirvísingarvirkemi. Tá er talan um avmarkaða tíð.

Næmingar og lærlingar skulu hava egna teldu við til undirvísing og próvtøku.

Hvør tími á Glasi byrjar við, at teldan er sløkt/latin aftur. Tað er lærarin sum ger av, nær teldan skal tendrast/latast upp og brúkast í undirvísingini. Tað er bert loyvi at brúka telduna til undirvísingarrelevant virksemi.

Næmingurin hevur sjálvur ábyrgd av egnari teldu. Hetta er eisini galdandi í sambandi við próvtøkur, tá næmingur fer frá próvtøku, áðrenn próvtøkan er liðug, og ikki fær útgerðina við sær úr hølunum.

Næmingurin fær atgongd til Officepakkan, meðan hann er lestrarvirkin. Tað er bannað at taka ólógligt tilfar niður. Næmingar skulu altíð brúka egið brúkaranavn og loyniorð, tá teir rita inn á skúlanetið. Ikki er loyvt at geva ella læna øðrum brúkaranavn og loyniorð. Tað er ikki loyvt at misnýta kontu hjá øðrum ella netið hjá skúlanum. Víst verður eisini til kunning um nýtslu av telefon, teldu og líknandi á heimasíðu okkara.

3.10 Trygd 

Á Glasi verður trygdin í og uttanfyri bygningin raðfest høgt. Tað merkir, at vit hava eina trygdarskipan á høgum stigi, sum skal takast í størsta álvara. Tað er somuleiðis av stórum týdningi, at øll hava eina felags ábyrgd av trygdini. Trygdarpolitikkur skúlans kann lesast her.

• Av trygdarávum er ikki loyvt at fara út á tekjurnar. Hetta merkir m.a., at tað er strangliga bannað at fara út á tekjurnar í teimum skúlastovum, har atgongd er út á tekjurnar gjøgnum vindeyguni – uttan í neyðstøðu.
• Tað er bannað at halda lutir uttanfyri glasgyrðingarnar á svalunum.
• Tað er bannað at kasta lutir av svalunum ella út gjøgnum vindeyguni.
• Atburður á verkstøðum og starvsstovum skal vera eftir vegleiðing og boðum frá undirvísarum.

3.11 Agatiltøk fyri brot á skilhaldsreglurnar 

Agatiltøk skulu vera rímilig í mun til framda brotið. Brot á reglurnar í sambandi við skilhald kunnu hava við sær, at næmingur/lærlingur:

• Fær eina áminning/ábreiðslu og boð um at bøta um støðuna  
• Fær skrivliga ávaring við boðum um at bøta um støðuna
• Missir rættin at luttaka í ávísum virksemi og tiltøkum
• Missir rættin til frálæru í upp til 10 dagar samanlagt hvørt skúlaár  
• Verður burturvístur

Um næmingur brýtur ásetingarnar um telefonnýtslu og t.d. ikki vil leggja telefonina í skápið, gevur lærarin næminginum boð um at fara á Stjórnarskrivstovuna og har lata telefonina inn. Næmingurin fær telefonina aftur, tá blokkurin er liðugur. Um brotið endurtekur seg fleiri ferðir, kunnu onnur agatiltøk setast í verk.

Um skúlin nýtir agatiltøk móti næmingi ella lærlingi, sum er undir 18 ár, verða foreldur/avvarðandi kunnað. Er talan um lærling, verður lærumeistarin eisini kunnaður.