Henda heimasíða nýtir farspor, fyri at veita tær best møguligu uppliving. Farspor verða goymd í tínum kaga, sum m.a. ger tað møguligt, at kenna teg aftur, tá tú kemur aftur til heimasíðu okkara, og hjálpa okkum at skilja, hvørjar partar av heimasíðuni tú finnur mest áhugaverdar.
Dysleksi í skúlanum
Í sambandi við skiftið frá fólkaskúla til miðnám ella yrkisnám, kunnu lesi- og skrivitrupulleikarnir viðhvørt kennast meira umfatandi. Tekstirnir í fakunum gerast nakað torførari og innihalda fleiri fakorð, enn áður. Krøvini eru vorðin hægri, og tí kunnu ymisk eyðkenni gerast týðiligari fyri tær. Hesi eyðkenni kunnu t.d. vera:
- Lægri lesiferð
- Óneyv lesing
- Møði
- Hugsavningartrupulleikar
- Trupult at orða seg í sambandi við skriving
- Trupult at lesa og læra nýggj orð
- Trupult at skilja faktekstir, serliga á fremmandamáli
Dømi um, hvussu dysleksi kann kennast
Á hesi videoini til høgru sæst, hvussu dysleksi kann vísa seg. Eisini vísir hon týðiliga, hvussu møðandi tað kann vera at lesa, um ein hevur dysleksi.
Set teg í samband við LST
Tú ert altíð vælkomin í Lesi- og skrivitænastuna (LST) við ivamálum og spurningum innan okkara øki. T.d. kunnu vit hjálpa tær at koma í gongd við at brúka lesi- og skrivitøkni, ella at hjálpa tær víðari við hesum. Hetta kann lætta um fylgjurnar av krøvunum í sambandi við skúlaarbeiði.
Góð ráð og kunning um lesi- og skrivitøkni, sum vit kunnu veita í LST, eru eisini hent frítíðini og í einum møguligum frítíðararbeiði.
