Hví brúka lesi- og skrivitøkni?

Dysleksi og aðrir lesi- og skrivitrupulleikar kunnu gera skúlaarbeiðið torførari.  

Lesi- og skrivitøkni loysir ikki allar trupulleikar við dysleksi, men kann gera t.d. skúlaarbeiði og vanligar gerandis aktivitetir sum t.d. at skriva sms, at kjatta, skriva teldupostar osfr. lættari og minni tíðarkrevjandi.  

Slík amboð kunnu til dømis lesa talgildar tekstir upp fyri tær, geva tær uppskot til orð, meðan tú skrivar tekst og stuðla stavingini. Harafturat kanst tú við slíkum forritum viðgera tekstir, sum ikki eru talgildir, soleiðis at teir kunnu lesast upp við lesi- og skrivitøkni.   

Samanumtikið kann sigast, at lesi- og skrivitøkni er vorðin ein hjálp og stuðul, sum tey flestu við dysleksi ikki vildu verið fyri uttan, tá tey hava roynt tað.  

Tað er sera ymiskt, hvussu dysleksi vísir seg, og tískil er tað ymiskt, hvørjar funktiónir í lesi- og skrivitøknini eru til størst nyttu hjá tí einstaka. Í Lesi- og skrivitænastuni hjálpa vit tær at finna fram til júst tín tørv, og hvørjar møguleikar tú hevur, og hvussu tú kanst fáa sum mest burturúr tøknini. Eisini undirvísa vit í nýtsluni av lesi- og skrivitøkni.